1ܒܲܣ ܡܘܼܕܝܼ ܐܵܡܪܵܚ ܕܐܲܒܼܪܵܗܵܡ ܪܹܫܵܐ ܕܐܲܒܼܵܗܵܬܲܢ ܡܘܼܫَܟ̰ܚܠܹܗ ܒܒܸܣܪܵܐ؛ 2ܣܵܒܵܒ ܐܸܢ ܐܲܒܼܪܵܗܵܡ ܡ̣ܢ ܦܘܼܠܚܵܢܹ̈ܐ ܦܸܫܠܹܗ ܡܘܼܟܫܸܛܵܐ؛ ܐܝܼܬ ܗܘܵܐ ܠܹܗ ܫܘܼܒܼܗܵܪܵܐ؛ ܐܸܠܵܐ ܠܵܐ ܠܟܸܣ ܐܲܠܵܗܵܐ. 3ܣܵܒܵܒ ܡܘܼܕܝܼ ܐَܡܝܼܪܹܗ ܟܬܵܒܼܵܐ؛ ܗܘܼܡܸܢܹܗ ܐܲܒܼܪܵܗܵܡ ܒܐܲܠܵܗܵܐ؛ ܘܦܸܫܠܹܗ ܚܘܼܫܒܸܢܬܵܐ ܐܸܠܹܗ ܠܙܲܕܝܪܩܘܼܬܵܐ. 4ܐܝܼܢܵܐ ܠܡ̇ܢ ܕܦܵܠܸܚ ܗܵܩܹܗ ܠܹܐ ܦܵܝܸܫ ܚܘܼܫܒܸܢܵܐ ܐܸܠܹܗ ܐܲܝܟܼ ܕܒܫܵܦܵܩܲܬ؛ ܐܸܠܵܐ ܐܲܝܟܼ ܕܒܕܵܝܢܵܐ. 5ܐܝܼܢܵܐ ܠܗ̇ܘ ܕܠܵܐ ܦܵܠܸܚ؛ ܐܸܠܵܐ ܗܲܡܸܢ ܒܗ̇ܘ ܕܡܲܟܫܸܛ ܠܚܲܛܵܝܹ̈ܐ؛ ܟܹܐ ܦܵܝܫܵܐ ܚܘܼܫܒܸܢܬܵܐ ܗܲܝܡܵܢܘܼܬܹܗ ܠܙܲܕܝܼܩܘܼܬܵܐ. 6ܕܵܐܟܼܝܼ ܕܐܘܼܦ ܕܵܘܝܼܕ ܗܘܼܡܙܸܡܠܹܗ ܥܲܠ ܛܘܼܒܼܹܗ ܕܐَܢܵܫܵܐ؛ ܗ̇ܘ ܕܐܲܠܵܗܵܐ ܟܹܐ ܚܲܫܒܸܢ ܐܸܠܹܗ ܟܹܐܢܘܼܬܵܐ ܕܠܵܐ ܦܘܼܠܚܵܢܹ̈ܐ؛ 7(ܒܹܐܡܵܪܵܐ)؛ ܛܘܼܒܼܵܐ ܠܐܵܢܝܼ ܕܦܸܫܠܹܗ ܫܒܼܝܼܩܵܐ ܐܸܠܵܝܗܝ ܥܵܘܠܵܝܗܝ ܘܦܸܫܠܗَܘܿܢ ܟܘܼܣܝܹܐ ܚܛܝܼܵܬܵܝ̈ܗܝ. 8ܛܘܼܒܼܵܐ ܠܐَܢܵܫܵܐ ܕܠܵܐ ܚܲܫܒܸܢ ܐܲܠܵܗܵܐ ܐܸܠܹܗ ܚܛܝܼܬܵܐ. 9ܒܲܣ ܐܵܗܵܐ ܛܘܼܒܼܵܐ ܥܲܠ ܓܙܘܼܪܬܵܐ ܝܠܹܗ؛ ܝܲܢ ܐܘܼܦ ܥܲܠ ܥܘܼܪܠܘܼܬܵܐ؛ ܣܵܒܵܒ ܟܹܐ ܐܵܡܪܵܚ؛ ܕܗܲܝܡܵܢܘܼܬܹܗ ܕܐܲܒܼܪܵܗܵܡ ܦܸܫܠܵܗ̇ ܚܘܼܫܒܸܢܬܵܐ ܠܙܲܕܝܼܩܘܼܬܵܐ. 10ܒܲܣ ܕܵܐܟܼܝܼ ܦܸܫܠܵܗ ܚܘܼܫܒܸܢܬܵܐ؛ ܟܲܕ ܝܼܗܘܵܐ ܒܓܙܘܼܪܬܵܐ؛ ܝܲܢ ܒܥܘܼܪܠܘܼܬܵܐ؛ ܠܹܐ ܗَܘܵܐ ܒܓܙܘܼܪܬܵܐ؛ ܐܸܠܵܐ ܒܥܘܼܪܠܘܼܬܵܐ. 11ܘܫܩܸܠܹܗ ܢܝܼܫܲܢܩܵܐ ܕܓܙܘܼܪܬܵܐ؛ ܡܵܘܗܪ ܕܙܲܕܝܼܩܘܼܬܵܐ ܕܗܲܝܡܵܢܘܼܬܹܗ ܕܒܥܘܼܪܠܘܼܬܵܐ؛ ܕܗܵܘܹܐ ܒܵܒܵܐ ܠܟܠܵܝܗܝ ܐܵܢܝܼ ܕܗܲܡܸܢܝܼ ܟܲܕ ܒܥܘܼܪܠܘܼܬܵܐ؛ ܕܐܘܼܦ ܠܐܵܢܝܼ ܙܲܕܝܼܩܘܼܬܵܐ ܦܵܝܫܵܐ ܚܘܼܫܒܸܢܬܵܐ؛ 12ܘܒܵܒܵܐ ܕܓܙܘܼܪܬܵܐ ܠܐܵܢܝܼ ܕܠܵܐ ܡ̣ܢ ܓܙܘܼܪܬܵܐ ܝܢܵܐ ܗܲܪ؛ ܐܸܠܵܐ ܐܘܼܦ ܠܐܵܢܝܼ ܕܚܵܕܪܝܼ ܒܫܵܘܦܵܦܹ̈ܐ ܕܗܲܝܡܵܢܘܼܬܵܐ ܕܒܥܘܼܪܠܘܼܬܵܐ ܕܒܵܒܲܢ ܐܲܒܼܪܵܗܵܡ. 13ܣܵܒܵܒ ܠܵܐ ܒܝܲܕ ܢܵܡܘܿܣܵܐ ܗَܘܹܐܠܹܗ ܩܵܘܠܵܐ ܠܐܲܒܼܪܵܗܵܡ ܝܲܢ ܠܙܲܪܥܹܗ؛ ܕܗܵܘܹܐ ܝܵܪܘܿܬܵܐ ܕܥܵܠܡܵܐ؛ ܐܸܠܵܐ ܒܝܲܕ ܙܲܕܝܼܩܘܼܬܵܐ ܕܗܲܝܡܵܢܘܼܬܹܗ. 14ܣܵܒܵܒ ܐܸܢ ܐܵܢܝܼ ܕܡ̣ܢ ܢܵܡܘܿܣܵܐ ܗَܘܹܐܠܘܿܢ ܝܵܪ̈ܘܿܬܹܐ؛ ܒܛܝܼܠܬܵܐ ܝَܠܵܗ̇ ܗܲܝܡܵܢܘܼܬܵܐ؛ ܘܒܘܼܛܠܵܐ ܝܠܹܗ ܩܵܘܠܵܐ. 15ܣܵܒܵܒ ܢܵܡܘܿܣܵܐ ܡܲܥܒܸܕܵܢܵܐ ܕܟܲܪܒܵܐ ܝܠܹܗ؛ ܣܵܒܵܒ ܐܲܝܟܵܐ ܕܠܲܝܬ ܢܵܡܘܿܣܵܐ؛ ܐܘܼܦ ܠܲܝܬ ܥܒܼܵܪܬܵܐ ܠܢܵܡܘܿܣܵܐ. 16ܣܵܒܵܒ ܕܐܵܗܵܐ ܒܗܲܝܡܵܢܘܼܬܵܐ (ܝܠܵܗ؛ ܕܗܵܘܝܵܐ) ܒܫܵܦܵܩܲܬ؛ ܕܗܵܘܹܐ ܩܘܼܝܵܐ ܩܵܘܠܵܐ ܠܟܠܹܗ ܙܲܪܥܹܗ؛ ܠܵܐ ܠܗ̇ܘ ܕܡ̣ܢ ܗܲܝܡܵܢܘܼܬܹܗ ܕܐܲܒܼܪܵܗܵܡ؛ ܕܝܼܠܹܗ ܒܵܒܵܐ ܕܟܠܲܢ؛ 17ܕܵܐܟܼܝܼ ܕܝܼܠܹܗ ܟܬܝܼܒܼܵܐ؛ ܕܩܲܡ ܡܲܬܒܼܸܢܘܼܟ ܒܵܒܵܐ ܠܪܵܒܵܐ ܛܵܝܸܦܹ̈ܐ؛ ܩܵܕَܡ ܐܲܠܵܗܵܐ ܗ̇ܘ ܕܗܘܼܡܸܢܹܐ ܒܝܹܗ؛ ܕܟܹܐ ܡܲܚܹܐ ܡܝܼܬܹ̈ܐ؛ ܘܟܹܐ ܩܵܪܹܐ ܠܐܵܢܝܼ ܡܢܕܝܼܵܢܹ̈ܐ ܕܠܹܐ ܝܢܵܐ؛ ܐܲܝܟܼ ܕܝܼܢܵܐ. 18ܗ̇ܘ ܕܕܲܪܩܘܼܒܼܠ ܕܗܹܒܼܝܼ ܒܗܹܒܼܝܼ ܗܘܼܡܸܢܹܗ؛ ܕܗܵܘܹܐ ܗَܘܵܐ ܒܵܒܵܐ ܠܪܵܒܵܐ ܛܵܝܸܦܹ̈ܐ؛ ܐܲܝܟܼ ܕܝܼܠܹܗ ܐَܡܝܼܪܵܐ؛ ܗܲܕܟܼܵܐ ܒܸܬ ܗܵܘܹܐ ܙܲܪܥܘܼܟ. 19ܘܠܵܐ ܦܸܫܠܹܗ ܙܲܒܘܼܢ ܒܗܲܝܡܵܢܘܼܬܹܗ؛ ܟܲܕ ܚܸܪܹܗ ܒܦܲܓܼܪܹܗ ܡܝܼܬܵܐ؛ ܕܝܗَܘܵܐ ܐܲܝܟܼ ܒܲܪ ܡܵܐܐ ܫܸܢܹ̈ܐ؛ ܘܒܡܲܪܒܥܵܐ ܡܝܼܬܵܐ ܕܣܲܪܵܐ. 20ܘܒܩܵܘܠܵܐ ܕܐܲܠܵܗܵܐ ܠܵܐ ܦܸܫܠܹܗ ܕܘܼܒܵܪܵܐ ܒܠܵܐ ܗܲܝܡܵܢܘܼܬܵܐ؛ ܐܸܠܵܐ ܚܘܼܠܸܢܹܗ ܒܗܲܝܡܵܢܘܼܬܵܐ؛ ܒܝܼܵܗَܒܼܵܐ ܬܸܫܒܘܿܚܬܵܐ ܠܐܲܠܵܗܵܐ؛ 21ܘܩܘܼܝܵܐ ܗܘܼܡܸܢܹܗ؛ ܕܡܸܢܕܝܼ ܕܩܘܼܘܸܠܵܐ ܗَܘܵܐ ܥܲܡܹܗ؛ ܡܵܨܹܐ ܗَܘܵܐ ܠܬܲܡܘܼܡܹܐ. 22ܣܵܒܵܒ ܕܐܵܗܵܐ ܦܸܫܠܵܗ̇ ܚܘܼܫܒܸܢܬܵܐ ܐܸܠܹܗ ܠܙܲܕܝܼܩܘܼܬܵܐ. 23ܘܠܹܐ ܗَܘܵܐ ܣܵܒܵܒ ܕܝܹܗ ܒܢܲܦ̮ܫܹܗ ܦܸܫܠܹܗ ܟܬܝܼܒܼܵܐ ܐܵܗܵܐ؛ ܕܦܸܫܠܵܗ̇ ܚܘܼܫܒܸܢܬܵܐ ܐܸܠܹܗ؛ 24ܐܸܠܵܐ ܐܘܼܦ ܣܵܒܵܒ ܕܝܲܢ؛ ܕܐܘܼܦ ܐܸܠܲܢ ܒܸܬ ܦܵܝܫܵܐ ܚܘܼܫܒܸܢܬܵܐ؛ ܕܗܲܡܘܼܢܹܐ ܝܘܵܚ ܒܗ̇ܘ ܕܡܘܼܩܸܡܠܹܗ ܠܡܵܪܲܢ ܝܼܫܘܿܥ ܡ̣ܢ ܡܝܼܬܹ̈ܐ؛ 25ܗ̇ܘ ܕܦܸܫܠܹܗ ܣܘܼܦܝܵܐ ܒܣܵܒܵܒ ܕܚܛ̈ܝܼܵܬܲܢ ܘܩܸܡܠܹܗ ܒܣܵܒܵܒ ܕܡܲܟܫܲܛܬܲܢ.